سندھ حکومت کا بڑا فیصلہ: سندھ میں الیکٹرک گاڑیوں پر ٹیکس اور رجسٹریشن مراعات میں 2 سال کی توسیع

کراچی: وزیراعلیٰ سندھ سید مراد علی شاہ کی زیر صدارت صوبائی کابینہ نے ماحول دوست ٹرانسپورٹ کو فروغ دینے کے لیے غیر تجارتی الیکٹرک گاڑیوں (EVs) پر ٹیکس اور رجسٹریشن کی رعایات میں مزید دو سال کی توسیع منظور کر لی ہے۔ محکمہ ایکسائز اینڈ ٹیکسیشن کی تجویز پر کی جانے والی اس توسیع کا مقصد صوبے میں درآمدی ایندھن پر انحصار کم کرنا اور فضائی آلودگی پر قابو پانا ہے۔ کابینہ کے فیصلے کے تحت الیکٹرک گاڑیوں کو دی جانے والی یہ خصوصی مراعات اب 30 مئی 2026 سے لے کر 29 مئی 2028 تک برقرار رہیں گی۔

منظور شدہ پیکیج کے مطابق الیکٹرک گاڑیوں کی رجسٹریشن فیس کو صرف 1,000 روپے پر برقرار رکھا گیا ہے، جبکہ غیر تجارتی الیکٹرک گاڑیوں کا سالانہ موٹر وہیکل ٹیکس بھی محض 500 روپے رہے گا۔ اس کے علاوہ الیکٹرک موٹر سائیکلوں کے لیے تاحیات (لائف ٹائم) موٹر وہیکل ٹیکس صرف 500 روپے مقرر کیا گیا ہے۔ تاہم، کابینہ نے یہ واضح کیا ہے کہ 2000 سی سی یا اس سے زائد پاور کی حامل الیکٹرک گاڑیوں پر 5,000 روپے لگژری ٹیکس عائد ہوگا، اور گاڑی کی تاخیر سے رجسٹریشن کروانے کی صورت میں 1,000 روپے جرمانہ دینا پڑے گا۔

وزیراعلیٰ سندھ نے اس موقع پر گفتگو کرتے ہوئے کہا کہ الیکٹرک موبیلٹی کے شعبے کو فروغ دینا اور اس میں سرمایہ کاری لانا سندھ حکومت کی ترجیحات میں شامل ہے۔ انہوں نے امید ظاہر کی کہ ٹیکسز میں ان مراعات کے تسلسل سے کاربن کے اخراج میں نمایاں کمی آئے گی اور شہروں کی ہوا کا معیار بہتر ہوگا۔ صوبائی حکومت کی اس حکمت عملی سے عام شہریوں کے لیے الیکٹرک گاڑیوں کی خریداری اور ان کا استعمال مزید آسان اور پرکشش ہو جائے گا۔