مہنگائی اور مصنوعی ذہانت سے تنگ 100 سے زائد افراد سمندر کے سامنے چیخنے پہنچ گئے، انوکھی تقریب
سان فرانسسکو : امریکی ریاست کیلیفورنیا کے شہر سان فرانسسکو میں روزمرہ زندگی کے بڑھتے ہوئے مسائل، مکانات کے مہنگے کرایوں اور مصنوعی ذہانت (اے آئی) کی تیز رفتار ترقی سے پیدا ہونے والے ذہنی دباؤ اور جھنجھلاہٹ کو نکالنے کے لیے شہریوں نے ایک انوکھی تقریب کا انعقاد کیا۔ شہر کے اوشن بیچ پر ایک سو سے زائد افراد جمع ہوئے اور انہوں نے بحرِ الکاہل (پیسفک اوشن) کی لہروں کی طرف منہ کر کے اپنے دل کا غبار نکالنے کے لیے بیک وقت زور دار چیخیں ماریں۔
اس منفرد اور اچھوتے ایونٹ کو "گٹرل اسکریم ایٹ دی سی” (سمندر پر دل کی گہرائی سے چیخنا) کا نام دیا گیا تھا، جس کا انعقاد سان فرانسسکو کے مقامی رہائشی ڈینیئل ایگن نے کیا۔ میڈیا سے گفتگو کرتے ہوئے ڈینیئل ایگن کا کہنا تھا کہ وہ جدید دور کی تیز رفتار زندگی اور معاشی مسائل کی وجہ سے شدید ذہنی دباؤ کا شکار تھے اور انہیں خود اپنے اندر سے غصہ نکالنے کے لیے ایک زوردار چیخ کی ضرورت محسوس ہو رہی تھی۔ انہوں نے سوچا کہ اس مصروف ترین دنیا میں ان کی طرح اور بھی بہت سے لوگ ہوں گے جو اس ذہنی تناؤ سے گزر رہے ہیں، اسی لیے انہوں نے سوشل میڈیا پر اس انوکھی تقریب کا اشتراک کیا تاکہ دوسرے لوگوں کو بھی اس میں شامل ہونے کا موقع مل سکے۔
تقریب میں شامل شرکاء کا کہنا تھا کہ سمندر کے سامنے کھڑے ہو کر چیخنے سے انہیں شدید ذہنی سکون ملا ہے اور ان کا بوجھ ہلکا ہوا ہے۔ ماہرینِ نفسیات کے مطابق، غصے اور ذہنی دباؤ کو اندر دبائے رکھنے کے بجائے اس طرح کھلی فضا میں باہر نکالنا صحت کے لیے مفید ثابت ہوتا ہے۔ سوشل میڈیا پر اس انوکھے احتجاج اور تقریب کی ویڈیوز وائرل ہو رہی ہیں، جنہیں انٹرنیٹ صارفین کی جانب سے بے حد پسند کیا جا رہا ہے اور دیگر شہروں کے لوگ بھی اپنے علاقوں میں ایسے ایونٹس کروانے کا تقاضا کر رہے ہیں۔