98 فیصد مرد دوستوں کے سامنے اپنی بیوی کا مذاق اُڑاتے ہیں: سنیتا مارشل
کراچی : پاکستان شوبز انڈسٹری کی نامور اداکارہ و ماڈل سنیتا مارشل نے ہمارے معاشرے میں مردوں کی جانب سے اپنی بیویوں کے ساتھ روا رکھے جانے والے نامناسب رویے پر گہری تشویش کا اظہار کیا ہے۔ حال ہی میں ایک مارننگ شو میں گفتگو کرتے ہوئے انہوں نے ازدواجی رشتوں میں احترام کی کمی اور معاشرتی رویوں پر کھل کر بات کی ہے۔
سنیتا مارشل کا کہنا تھا کہ ہمارے معاشرے میں تقریباً 98 فیصد مرد دوستوں کی محفلوں میں بیٹھ کر اپنی بیویوں کا مذاق اڑاتے ہیں۔ انہوں نے واضح کیا کہ یہ منفی رجحان ہمارے یہاں دیسی کلچر میں بہت زیادہ پایا جاتا ہے، جبکہ مغرب (مغربی ممالک) میں ایسا کوئی تصور یا کلچر نہیں ہے جہاں سرِعام شریکِ حیات کی تضحیک کی جائے۔
اداکارہ نے مردوں کے تند و تیز رویے کی مثال دیتے ہوئے کہا کہ اگر کسی محفل میں بیوی سب کے سامنے کوئی مشورہ دے، تو شوہر اسی وقت سب کے سامنے کہہ دیتے ہیں کہ اپنے بیوقوفوں والے مشورے اپنے پاس رکھو۔ سنیتا مارشل نے اس رویے کی مذمت کرتے ہوئے کہا کہ اگر مرد کو بیوی کا کوئی مشورہ غلط بھی لگا تھا، تو وہ بعد میں گھر جا کر اکیلے میں بھی اسے پیار اور طریقے سے سمجھا سکتے تھے، لیکن سب کے سامنے ذلیل کرنا کسی صورت درست نہیں ہے۔ ان کا یہ بیان سوشل میڈیا پر وائرل ہو رہا ہے جہاں خواتین ان کے مؤقف کی بھرپور تائید کر رہی ہیں۔