ایران نے زیرِ زمین تنصیبات میں بیلسٹک میزائلوں کی تیاری دوبارہ شروع کر دی: امریکی حکام کا دعویٰ

امریکی حکام نے دعویٰ کیا ہے کہ ایران نے اپنی خفیہ زیرِ زمین تنصیبات میں پہلے سے ذخیرہ شدہ پرزہ جات کی مدد سے بیلسٹک میزائلوں کی پیداوار کا عمل دوبارہ شروع کر دیا ہے۔ امریکی اخبار ‘وال اسٹریٹ جرنل’ نے اپنی ایک رپورٹ میں امریکی حکام کے حوالے سے بتایا ہے کہ جنگ کے ابتدائی مرحلے میں ایران کی میزائل سائٹس اور صنعتی تنصیبات پر حملوں کے باوجود، ایرانی فوج مائع اور ٹھوس ایندھن سے چلنے والے میزائلوں کی اسمبلنگ میں مصروف ہے۔

رپورٹ کے مطابق، ایران بیرونی سپلائی چین پر انحصار کرنے کے بجائے اپنے موجودہ پرزہ جات کو استعمال کر کے یہ بیلسٹک میزائل تیار کر رہا ہے۔ امریکی اخبار نے مزید واضح کیا کہ بیلسٹک میزائلوں کی تیاری کا یہ حساس کام مکمل طور پر زیرِ زمین محفوظ تنصیبات میں جاری ہے، تاہم جنگ شروع ہونے سے پہلے کے مقابلے میں اب یہ میزائل کافی محدود تعداد میں تیار کیے جا رہے ہیں۔ اس پیش رفت کے بعد مشرقِ وسطیٰ میں سیکیورٹی کے حوالے سے شدید تشویش پیدا ہو گئی ہے۔