مردان: تخت بھائی میں سری بہلول پولیس چیک پوسٹ پر دستی بم حملہ، 2 اہلکار زخمی
مردان : خیبر پختونخوا کے ضلع مردان میں تھانہ تخت بھائی کی حدود میں قائم پولیس چیک پوسٹ پر نامعلوم دہشت گردوں نے دستی بموں سے حملہ کر دیا، جس کے نتیجے میں ڈیوٹی پر مامور دو پولیس اہلکار زخمی ہو گئے ہیں۔
ذرائع کے مطابق، یہ لرزہ خیز واقعہ تخت بھائی کے تاریخی علاقے سری بہلول کی پولیس چیک پوسٹ پر پیش آیا، جہاں نامعلوم موٹر سائیکل سوار ملزمان نے چیک پوسٹ کو نشانہ بناتے ہوئے یکے بعد دیگرے دستی بم (گرنیڈز) پھینکے اور اندھیرے کا فائدہ اٹھاتے ہوئے موقع سے فرار ہو گئے۔ دھماکے کے نتیجے میں چیک پوسٹ پر تعینات دو اہلکار شدید زخمی ہوئے۔
واقعے کی اطلاع ملتے ہی پولیس کی بھاری نفری اور ریسکیو ٹیمیں فوراً جائے وقوعہ پر پہنچ گئیں اور زخمی اہلکاروں کو فوری طبی امداد کے لیے قریبی اسپتال منتقل کر دیا گیا ہے، جہاں ڈاکٹرز کے مطابق ان کی حالت خطرے سے باہر ہے۔ پولیس نے علاقے کو گھیرے میں لے کر سرچ آپریشن شروع کر دیا ہے، جبکہ گرنیڈ حملے کا مقدمہ انسدادِ دہشت گردی ایکٹ کے تحت درج کر کے تفتیش کا آغاز کر دیا گیا ہے۔