پاکستانی ریسلر انعام بٹ کا ڈوپ ٹیسٹ مثبت آگیا، کارروائی کا فیصلہ

پاکستان کے نامور اور عالمی شہرت یافتہ ریسلر انعام بٹ کا ڈوپ ٹیسٹ مثبت آنے کے کیس میں ایک نئی اور اہم پیش رفت سامنے آئی ہے، جس کے بعد ان کے خلاف ضابطے کی کارروائی کا امکان پیدا ہو گیا ہے۔ ذرائع کے مطابق انعام بٹ نے بینائی کے علاج کے لیے ایک مخصوص دوا استعمال کی تھی، تاہم انہوں نے ایشین بیچ گیمز کے دوران اپنے ڈوپ ٹیسٹ سے قبل انتظامیہ کو اس دوا کے استعمال سے متعلق باقاعدہ مطلع نہیں کیا تھا، جس کے باعث مئی میں انہیں ایک باضابطہ نوٹس جاری کیا گیا۔ نوٹس موصول ہونے کے بعد قومی ریسلر نے اپنے دفاع میں آنکھوں کے تمام طبی ٹیسٹ، اسکینز اور استعمال کی جانے والی ادویات کی تفصیلی فہرست متعلقہ حکام کے سامنے پیش کر دی ہے

طبی دستاویزات اور رپورٹس کا باریک بینی سے جائزہ لینے کے بعد حکام نے انعام بٹ کی بیماری اور عارضے کو تسلیم کر لیا ہے، جبکہ انٹرنیشنل ٹیسٹنگ ایجنسی (ITA) نے بھی اس کیس کا ازسرنو جائزہ لینے کے بعد ان کا دوبارہ ٹیسٹ لیا ہے۔ ذرائع کا کہنا ہے کہ آئی ٹی اے کو ادویات کی فراہمن کردہ مکمل فہرست کے بعد اب انعام بٹ کو ان ادویات کے استعمال کی اجازت دے دی گئی ہے، کیونکہ ابتدائی ڈوپ ٹیسٹ میں ممنوعہ دوا کی انتہائی معمولی مقدار پائی گئی تھی، جو یہ ثابت کرتی ہے کہ یہ دوا کارکردگی یا قوت بڑھانے کے لیے نہیں بلکہ صرف علاج کی غرض سے لی گئی تھی۔

اس تمام تر صورتحال کے باوجود، ڈوپ ٹیسٹ سے پہلے ادویات کے استعمال کی پیشگی اطلاع نہ دینے کی وجہ سے قومی ریسلر کو تادیبی کارروائی کا سامنا کرنا پڑ سکتا ہے، اور اس سلسلے میں متعلقہ اسپورٹس اتھارٹیز کے ساتھ ان کی خط و کتابت کا سلسلہ تاحال جاری ہے۔ ذرائع نے تصدیق کی ہے کہ انعام بٹ اپنے ‘بی سیمپل’ کے ٹیسٹ کے لیے رجوع نہیں کریں گے، تاہم اگر ضرورت پیش آئی تو وہ اپنے دفاع اور انصاف کے حصول کے لیے اس معاملے کو کھیلوں کی ثالثی عدالت (Court of Arbitration for Sport) میں لے جانے کا حق محفوظ رکھتے ہیں۔