قومی بچت اسکیموں کے منافع میں کمی: بہبود سیونگ سرٹیفکیٹ کی شرح 12.60 فیصد مقرر
اسلام آباد: قومی بچت اسکیموں (نیشنل سیونگز) میں سرمایہ کاری کرنے والوں کے لیے اہم خبر آگئی ہے، جہاں حکومت نے بیشتر اسکیموں کی شرحِ منافع میں کمی کر دی ہے۔ جاری کردہ نوٹیفکیشن کے مطابق، مختلف سیونگ اسکیموں کے منافع میں رد و بدل کیا گیا ہے، جس کے تحت زیادہ تر اسکیموں کا منافع کم ہوا ہے جبکہ صرف ایک سالہ شارٹ ٹرم سرٹیفکیٹ کی شرح میں معمولی اضافہ ریکارڈ کیا گیا ہے۔
تفصیلات کے مطابق، پنشنرز بینیفٹ اکاؤنٹ اور بہبود سیونگ سرٹیفکیٹس کی شرحِ منافع میں 36 بیسس پوائنٹس کی کمی کی گئی ہے، جس کے بعد اب نئی شرح 12.60 فیصد ہو گئی ہے۔ اسی طرح، ریگولر انکم سرٹیفکیٹس کی شرحِ منافع بھی 36 بیسس پوائنٹس کمی کے ساتھ 11.16 فیصد پر آ گئی ہے، جبکہ اسپیشل سیونگ اکاؤنٹ کی شرحِ منافع 30 بیسس پوائنٹس کی کمی کے بعد 10.90 فیصد مقرر کی گئی ہے۔
نوٹیفکیشن کے مطابق، تین ماہ کے شارٹ ٹرم سیونگ سرٹیفکیٹس کی شرحِ منافع میں 26 بیسس پوائنٹس اور چھ ماہ کے سرٹیفکیٹس میں 28 بیسس پوائنٹس کی کمی کی گئی ہے، جس کے بعد یہ دونوں شرحیں 10.86 فیصد ہو گئی ہیں۔ دوسری جانب، ایک سالہ شارٹ ٹرم سیونگ سرٹیفکیٹس کی شرحِ منافع میں 11 بیسس پوائنٹس کا معمولی اضافہ دیکھا گیا ہے، جس کے بعد یہ شرح 11.28 فیصد تک پہنچ گئی ہے۔
قومی بچت کے مطابق، منافع کی ان نئی شرحوں کا اطلاق فوری طور پر ہوگا، جس سے فکسڈ انکم (مستقل آمدن) پر انحصار کرنے والے سرمایہ کاروں اور بزرگ شہریوں کی ماہانہ آمدنی متاثر ہونے کا خدشہ ہے۔