بولڈ ویڈیو کلپ وائرل ہونے پر شدید تنقید: معروف اداکار سہیل سمیر کی مداحوں سے معذرت

کراچی: پاکستانی ڈرامہ اور فلم انڈسٹری کے نامور اداکار سہیل سمیر نے سوشل میڈیا پر اپنا ایک نازیبا اور بولڈ ویڈیو کلپ وائرل ہونے کے بعد شائقین اور مداحوں سے باقاعدہ معافی مانگ لی ہے۔ متعدد ٹی وی ڈراموں میں رومانوی، کامیڈی اور منفی کرداروں میں جاندار اداکاری کے باعث داد سمیٹنے والے اداکار کو اس وقت شدید عوامی غصے کا سامنا کرنا پڑا جب ان کی ایک پرانی سسپنس تھرلر شارٹ فلم کا نازیبا حصہ انٹرنیٹ پر لیک ہو گیا۔ اس کلپ میں وہ ایک شریک اداکارہ کے ہمراہ نظر آ رہے تھے، جس پر سوشل میڈیا صارفین نے سخت برہمی کا اظہار کرتے ہوئے ایسے مواد پر مکمل پابندی کا مطالبہ بھی کیا۔

انٹرنیٹ پر ہونے والی اس سخت تنقید کے جواب میں سہیل سمیر نے ایک تفصیلی معذرتی بیان جاری کرتے ہوئے اپنی غلطی کا اعتراف کیا ہے۔ انہوں نے وضاحت کی کہ یہ متنازع کلپ دراصل ان کے ایک 10 سال پرانے پراجیکٹ کا حصہ ہے جسے اب جا کر ریلیز کیا گیا ہے۔ اداکار کا کہنا تھا کہ ماضی میں کام کرتے وقت انہیں اس بات کا اندازہ نہیں تھا کہ یہ مستقبل میں ان کے لیے پشیمانی کا باعث بنے گا، لیکن اب انہیں احساس ہو چکا ہے کہ ان کے اپنے گھر میں بھی ماں، بہنیں اور بیٹیاں موجود ہیں۔ انہوں نے اعتراف کیا کہ حالات جیسے بھی ہوں، انہیں اس نوعیت کے مواد کا حصہ نہیں بننا چاہیے تھا اور وہ اس پر دل سے شرمندہ ہیں۔